بحث هذه المدونة الإلكترونية

الأربعاء، مايو 27، 2009

تعليق المدونة أثناء الماتش و بعد الماتش كمان


الصورة من النت


أنا خلصت فصل من الكتاب برونولد فقلت بالمناسبة اكتب لكم تعليق المدونة أثناء الماتش و بعد الماتش كمان


قبيل الماتش فى الشوارع:


من داخل البيت نسمع كل شوية تاكسى او ملاكى يهيص و يزمر له شوية العربات ازدانت بالوان الاسماعيلى شوفت عربية عليها رمز النازى استغربت فتحت التلافازيون شوفت شوبير و كابتن محسن صالح و قلبت فى القنوات قبل الماتش ثم استقرينا نحن العائلة الإسماعلاوية على قناة الحياة و خلاص
من أولها تسلل أبوتريكة الممثل و بيستظرف كمان ولا يمكن بيستمحن الحكم الأسبانى و عايز يدخل جون
بعد 4 دقائقق الجهلى دخل الهدف الأول من الثنائى الافريقى جلبرتو و فلافيو
هو احنا بنلعب مع فريق إيه بالظبط؟
شربت شاى بالنعناع المعلق مالوش حل على قناة الحياة تعليقاته مستفزة تركت التليفزيون حتى لا أصاب بأمراض العصر العصبية قعدت اسمع أغانى سميح شقيرعلى اللاب توب يمكن اهدأ لكن أذنى مع الماتش كل شوية
ثم توالت الأهداف الضائعة و الشد و الجذب خلاص مش هتفرج قعدت ادعى و قلت لماما - و هى مشغولة عنا وبتراجع فى التلاوة - لو تدعى لنا و انا كمان دعيت يارب نرجع معانا الدورى لاحسن احنا من زمان مش فرحنا
و لو حصل و اتهزمنا مش عارفين هيعملوا ايه يمكن ..... فى الاسكندرية
ما هو بيقولك -المعلق اللى بيقول لك - ان الجمهور 12 الف اسماعلاوى و زيهم جهلاوى يبقى هيعملوا ايه؟
يا رب استر يا ستير
فاصل و نواصل
...........
*****************************************
فيه ايه؟
الناس ما سمعت لهاش حس الكل كاتم نفسه ولا ايه و هو بيتابع الماتش
يمكن كل جيراننا ماتوا من الغيظ؟
مفيش غير المعلق عامل لى دوشة كل شوية
طيب انا مش انهزامية قوى
لكن مفيش مانع اما اجهز مبررات الهزيمة من دلوقت
ولا ايه؟
**********************************
اقتراح عاجل اثناء الماتش:
انا اقترح بعبقريتى يطلبوا وقت مستقطع زى كرة اليد و لا الطائرة
ليه يا عبقرية
علشان اللعيبة يخذوا لهم كلمتين علشان يفوقوا لو مش بيلعبوا كويس
و ياريت يفتكروا و ده الاهم انهم سوف........ (ضع ما تريد ) على ابواب الاسماعيلية لو رجعوا لنا من غير درع الدورى لكن لو بيلعبوا كويس خلاص مفيش داعى لوقت مستقطع ربنا معاهم
انتهى الشوط الاول تابعونا بعد الاستراحة
******************************
صليت المغرب و رحت اذاكر
انا عندى مشكلة اكبر من الدورى هاعمل لها بوست لوحده
باختصار الكتاب الجديد اللى اشتريته خطه نمنم صغير خالص
طب اقرأ فيه و الخص و لا الون فيه ازاى... استخدم العدسة المكبرة ؟
ولا اقرأ و الخص بره فى كشكول بخطى الجميل
_______________________________________
الشوط التانى
انتهى الماتش
فاز الجهلى
مبروك
شوفتوا عادى خاص

___________________________________

تعليق المدونة بعد الماتش كمان
البحث عن طبيب أهلاوى
يا ولاد الحلال حد شاف دكتور اهلاوى؟

اه هو مش تايه بالظبط لكن
هو اهلاوى و مش قيل لوالده و مخبى ليه سنين
و سافر من قبل الماتش بيوم..... ليه؟
تمويه علشان ميبانشى مع الاسماعلاوية الزاحفين يا ولداه 120 كيلو حتى الاسكندرية
و جلس فى صفوف مشجعى الجهلى
كيف استطاع هذا الخائن؟
و حاليا عائد إلى الإسماعيلية بعد الماتش
فمن يجده فى المعركة فليقتله
عفوا قصدى يعمل فيه اللى هو عايزه بعد الماتش
القتل ارحم طبعا من اللى هيتعمل فيه
صفاته هو اسمرانى بنظارة (خلقة ربنا)
دكتور اى نعم لكن لسه لسه نائب ناااااااااائب
اظن كده هتعرفوه على طول دى علامة مميزة (نائب) بيبانوا فى اى مكان
يا خسارة لو كنا نعرف!
كان زمانه نوباتجى من اسبوع.
عادى يعنى ارحم من اللى هيحصل له لو دخل الاسماعيلية
فاضل ايه تانى اقوله فاضل ايه ؟



· اه خليه فى الاسكندرية برده احسن من الاسماعيلية هواء و بحر
· خليهم يتبنوه فى الجهلى يمكن يدوه الستة عين بتوع الدكاترة و ياريت يوعدوه زى وعود الحكومة و انتوا عارفين طبعا وعود الحكومة...ده احسن انتقام منه
· و لا يمثلوا عليه زى ما الخلوق الممثل بيمثل اليومين دون استعدادا لبطولة فيلم الجهلى جهلك...وكده يسيب الطب و يركز فى التمثيل قصدى التمثيل الكروى
· ويا ريت كمان لو يعملوه دكتور الفريق الجهلى
و دى تكون فرصتنا علشان نخلص من الفريق الجهلى بعد ما حضرته يعالجهم بعبقريته الفذة
يعنى جهلى بيعالج جهلى يبقى التنين ههيخلصوا على بعض
و نترتاح من الاتنين
باااااااى

*******************************



حتى انت يا دودى
دودى طلعت جهلاوية
هى دكتورة من اسماعيلية و مسافرة بره
و قد جاءنا الآن أنباء عن قطع العلاقات الدبلوماسية لو طلع الكلام ده صح

*********************************
جيران الهنا
فى جيران لينا سمعناهم بهيصوا فى نهاية الماتش لثوان قليلة
و قد تركناهم احرارا بعد التعذيب
نحن لم نفعل ذلك لانهم جهلاوية
ولا لانهم هيصوا ولو لثوان معدودة
تفتكروا ليه
لان هى دى الديموقراطية !!!
********************************
تعليق المدونة وتعليق الصحافة
مدح ولا ذم

يقولون أن على ادارة الاسماعيلى من الان جلب لاعبين شرسين فى مواقع الهجوم و الدفاع و خط الوسط و ........
أقول لهم: اعتقد ان على ادارة الاسماعيلى من الان جلب لاعبين سوبر فى التمثيل وذلك لمواقع الهجوم خاصة لأنهم حقا افتقدوهم فى الفترة الاخيرة لو أرادو الفوز بأى بطولة
و من الممكن استيراد لاعب خلوق جدا بارع حقا فى الهجوم لكنه الأجدر فى التمثيل
********************
منجااااوى
يقولون لك منجاوى
قل لهم جهلاوى
و حرام علينا جهلكم الجهلاوى
و حرام عليكم المانجو الإسماعلاوى
****************************
خلى عندك هدف يا قليل الهدف
يقولون: إن هدفه الأعظم هزيمة الأهلي و بعدها ينام شهر !!خلي هدفك أكبر من كده !
صدقتم: فليكن هدفنا هو هزيمة الأهلى أو غيره بشرف و هنيئا لكم الهدف الأكبر بدون شرف.
**************************************************
أنا قلت من الأول الدورى الموازى:

فى بداية الدورى كنت قلت هذا الاقتراح تعليقا على انتقال اللاعبين من الاسماعيلى للجهلى بعد ما يظهروا و يكبروا ياخدوهم على الجاهز بفلوسهم

اقترحت انه لا داعى لأن نلعب مع الأهلى و المفروض إننا نلعب فى دورى موازى منفصلين عن الأهلى و هو يلعب لوحده كده طوال مباريات الدورى و يكسب لوحده و يأخذ البطولة على مقاسه و يحتكر المنصب الاول و باقى الفرق تلعب على الثانى

و بعدين لما نحب نهنئ فريق على الفوز نهنيه على المنصب الثانى و الثالث و الرابع و هكذا

و الان مش هنهنى فريق الأول لأن النجاح له طعم بعد المنافسة الشريفة و ليست باخذ النجوم من الفرق المناسبة و ليس بالمنافسة فى الوقت بدل بدل الضائع

و بهذا كله نلغى المنصب الاول المحجوز مقدما لوحيد القرن - وهذا ليس ذما إطلاقا-و بلاش وجع قلب و حرقة دم و مواجهة مع الجهلى وحيد القرن


المنافسة الاعلامية
:
ليست المنافسة الإعلامية تكمن فى أن يطل علينا عضو المجلس الموقر فى قناة الحياة ليفتى و يقول إيه رأيكم فى احتساب عدد الأشواط و يستظرف أكثر و يقترح إيه رأيكم فى اقتسام درع الدورى ست شهور مع كل فريق وذلك قبل المبارتين النهائيتين بأيام
و فى الآخر يقول للمشاهدين انا كنت باهزر معاكم



ودى من قناة مودرن



رااااااااااااااااااااح


http://videohat.masrawy.com/view_video.php?viewkey=4d5fdaeffcf9d9b6be00


هناك 8 تعليقات:

شجر الليمون يقول...

السلام عليكم
مافيش حل
انا بقول نسيب الدوري ليهم من الاول وخلاص
الدنيا كلها اتملت بالجهل الاحمر واللون المزيف الاحمر
حسبنا الله ونعم الوكيل

Sonnet يقول...

أنا بقول برده
ما له الدورى الموازى
كل الفرق تلعب مع بعض لوحدنا
و هو يأخد اللعيبة زى ما يحب مننا
يارب الدنيا تتملى أصفر

Sonnet يقول...

يا جماعة التدوينة دى لا تقصد الإساءة لأحد
أنا باجمع لكم نبض الجماهير مع شوية فرفشة
مافيش زعل

أحمد سعيد بسيوني يقول...

اقول

في الماتش الفاصل

ذهب الدرع لمن يستحقه

وبس

الفقيرة إلى الله أم البنات يقول...

هههههههههههه
بجد انت جميله
انا بقى معدش ليا فى الكورة
زملكاويه بنت زملكاوىوزوجة زملكاوى وام لأهلويه
والحكاية دى لها قصهاقرأى البوست ده
وهتعرفى يعنى ايه أم زملكاويه تنصاب فى بنتها وتطلع أهلاويه
http://oumelbanat.blogspot.com/search?q=%D9%81%D9%89+%D8%A8%D9%8A%D8%AA%D9%86%D8%A7+%D8%AE%D8%A7%D8%A6%D9%86

إصابه فى العمق
واللى يغظيك اكتر التعليقات
على فكرة انا بحب الاسماعيلى جدا
طبيعى مش زملكاويه
بس خلاص سيبت الكورة
وبصراحه ماما عندها حق تراجع النلاوة أفضل
تدوينه تعتبر وصف وشرح دقيق لاحوال الناس فيما يخص الكورة
دمت بفضل الله بخير يا جميله

AmiroZ يقول...

خبر جديد وحصري: ظهور حالات من مرض انفلوانزا " الدراويش " فى العائدين من المكس !!!
==================================
تقارير : المرض ظهر فى الاسماعيلية وميت عقبة وتحور بشراسة حالات الشفاء تكاد تكون معدومة ... والمرض غالبا ما يؤدى للحالة إللى شوفناها ساعة جول أحمد فتحى فى الجيش
- اعتبار الاسماعيلية منطقة موبوءة ومحاولة لمحاصرة المصابين خارجها ... حيث أن المصابين يتحورون بصورة مماثلة للفيروس ...
- مفاجأة مروعة ... مشجعى الزمالك أكثر الجماهير عرضة للإصابة بالمرض ! والمرض للأسف ينتشر بصورة سرية ...
-لأول مرة المرض ينتقل عن طريق " المشاهدة " والمخالطة ومتابعة أخبار المصابين ... الأعراض تبدأ " باحتقان " ضد الأهلى وتنتهى بحالات مشابهة لما حدث مع جول فتحى
- الأهلى يتعاون مع اتحاد الكرة لفك طلاسم المرض
- الوقاية سهلة من المرض وتعتمد كليا على متابعة الأعراض واكتشاف المرض مبكرا ... تجنب الرياضة اليوم والأهرام المسائى والكورة مع شوبير ومودرن بقناتيها وبعض المواقع مثل زمالك تى فى واسماعيلى أون لاين
- أشهر المصابين حاليا خارج الإسماعيلية : ممدوح سليمان والغندورين وشلبى ومدحت خطاب وأسامة خليل وميلاد زكريا ..
- هذا وقد اعطى السيد المحافظ اوامره باعدام مائتى طن من المانجة ... وقد علق سيادته قائلاً "المانجة باظت"!!!
إستفتاء: هل أنت مصاب بمرض انفلوانزا الدراويش ؟؟؟
إذا كنت مقتنع أو تردد بعض أو كل الآتى فأنت مصاب بالمرض فى مراحله الأخيرة:
الأهلى يفوز بالحكام ...
الإعلام أهلاوى ...
الحرس فوت للأهلى ...
جوزيه مدرب فاشل أو محظوظ...
الأهلى يسرق لاعبى الإسماعيلى ...
الإسماعيلى صاحب أفضل كورة فى مصر ...
======================================
مبروك الدورى للأهلى ولا عزاء لفرق الكومبارس

AmiroZ يقول...

المفتش كرومبو ولغز ال"حقيقى" فى السرايا ال"صفرا"!!!
====================================
و أنا خارج من استاد المكس بالاسكندرية
بعد ان فاز النادي الاهلي على فريق الاسماعيلي و كان معايا " سحس " المساعد بتاعي فجأه لقيت "سحس" بيقولي شوفت مدرب الاسماعيلي بيقول انه هو بطل الدوري " الحقيقي" فقلت" لسحس" بسرعة اللي انا اعرفه ان الاهلي بطل الدوري" المصري" و الاسماعيلي كان بيشارك في الدوري المصري و مشاركش في بطولة الدوري "الحقيقي"
هي دولة الحقيقي دي فين ؟!!
و لا يكون قصده زي دوري "فودافون" و دوري" اتصالات" هي في شبكة محمول جديدة اسمها" الحقيقي"
قالي ممكن فعلا تكون دعاية لشبكة محمول جديده و هايكون المفتاح بتاعها ( زيرو - سته)
قلتله ممكن برضه يكون اعلان لفيلم جديد هاينزل السوق اسمه ( الحقيقي نص دستة أشرار) و بالتأكيد البطولة مشتركة بين الزمالك و الاسماعيلي!!!
تاني يوم بفتح التلفزيون علشان اعرف سر" الحقيقي"
لقيت واحد شعرة أبيض و لابس بدله و شكله محترم و لكن الغريب انه قاعد في وسط ناس كتير لابسه أصفر فاقع و قعدين بيقولوا دراويش دراويش و بيرقصوا و بيهيصوا انا قلت في نفسي أكيد دي" السرايا الصفرا"
و بدأ الراجل اللي شعره أبيض يتكلم و قال ان الغلط اننا نجيب حكم من اسبانيا لهذه المباراة لان المعروف أن اسبانيا كلها بتشجع اللون الأحمر
فعلم الدولة لونه احمر!!!!!
و مصارعة التيران بتعتمد على اللون الاحمر!!
ده حتى لون فانلة اسبانيا لونها احمر!!
والحكم الاسباني ما حسبش جول حمص لان رمزي صالح مش من حقه يضرب و يتم تعطيله من اللاعب الافريقي قانون الفيفا بيقول الضرب في رمزي صالح و تعطيله عن ملاحقة الكرة جائز بل هو من الامور التي يجب الحرص عليها!!
اما هدف الاهلي فهو فضيحة تحكيمية فهو فاول واضح و صريح على وائل جمعة و كمان رمزي صالح و محمد صبحي كانو في موقف تسلل واضح!!!
بالاضافة انه كان في 6 ضربات جزاء مؤكده لصالح الاسماعيلي و 4 مشكوك فيها
و كمان الحكم تغاضى عن طرد 6200 مشجع اهلاوي لانهم كانوا معليين صوتهم و بيقولوا أهلي أهلي و ده أثر بالسلب على تركيز لاعبي الاسماعيلي و الماده رقم 107 بطولات من قانون الفيفا تؤكد وجوب طرد هؤلاء المشجعين!!!
و اخيرا قال هذا" الرجل المحترم" انه كمشجع اسماعيلاوي كان يتمنى فوز الاسماعيلي و لكن الحكم الاحمر كان له رأي آخر!!!!!
بعد ها اتصلت" بسحس "اسأله مين الراجل ده قالي ده اللي حكم ماتش الاهلي و الشرطة
قلتله اللي د . علاء صادق قال فيه ما قاله مالك في الخمر
رد" سحس "خمر ايه يا "كورمبو" دلوقتي الموجود في السوق " مانجة بايظه " من انتاج شركة" الحقيقي" الموزع الرسمي" للبانجو الحقيقي"

سؤال حلقتنا النهاردة أيه هو "الحقيقي"؟
صنف من المخدرات نزل السوق و بعيشك في الوهم الحقييقي؟!!
شبكة محمول جديدة و بتستقبل شبكتها 6 اهداف هاتفية لكل عميل؟!!!
قسم موجود بالسرايا الصفرا و العباسية لاستقبال حالات الوسواس القهري الاضطهادي ؟!!!
لو عرفت الاجابة اتصل بيا على تليفون 06,61
لو لقيت الرقم مشغول حاول الاتصال العام المقبل
مع تحيات كورومبو

Sonnet يقول...

welcome visitors
أهلا بالزوار
احمد سعيد
AmiroZ
أم البنات
شكرا جزيلا

Related Posts Plugin for WordPress, Blogger...