بحث هذه المدونة الإلكترونية

السبت، ديسمبر 20، 2008

اتصالات بتسلم عليكم وبتعيد عليا

تحديث
أنا فى معسكرالمذاكرة ثانى
*****************
أحب أن أواسيكم فيما حدث للانترنت
لكن لا أخفيكم سرا
أن الذى حدث قد يجعلكم تشعروا معى بما أعانيه منذ شهور

* هذا أول الحكاية
فقد جربت خدمة اتصالات الوايرليس نظرا لسفرى المتكرر
و دفعت عرض الشهور الستة الفائق السرعة مقدما
1800 جنيه

* و افاجأ بخدمة أضعف من الديال اب
و كلما ذهبت للشركة لا احصل على حل مفيد
و علمت أن الشبكة لا تغطى كل المحافظة جيدا
و اوقات تشتغل و اوقات لا

* و عندما حاولت أغير الباقة التى اشتريتها ولم استفد منها
أجد الرد أنك خلاص اشتريتى و اتدبستى لكن بكل أدب
و صراحة كانوا ناس ذوق ذوق و هم بيقولوا لى كده
أنا قلت اشكرهم و اعمل لهم دعاية مضادة

*و مرة أرسلوا لى رسالة إنه على دفع الفاتورة و إلا هيشيلوا العدة
بينى و بينكم أنا خفت على العدة
روحت للمكتب الفرعى استفسر
و فهمتهم إنى دافعة 6 شهور مقدم
فلوس إيه الى عايزينها
هم كمان استغربوا و اتصلوا بالكبير بتاعهم فى العاصمة
و يمكن كمان اتصلوا بأدهم صبرى و أجاثا كريستى
ليعرفوا اللغز

*لكن المفاجأة انهم قالوا لى انه ادفع الاول
لأن المبلغ وضع بطريق الخطأ
بسبب رسائل زايدة بمبلغ 36 جنيه
فدفعت و كانت الخدمة توقفت فعلا
و اتصلت بخدمة العملاء ثانى
وعادت الخدمة
لكن ربى سلما

* حاولت اشتكى فى حقوق المستهلك دى و لا اسمها ايه
لكن ادركت إن هم مش غلطانين صراحة
أنا اللى ساكنة فى منطقة داخل نطاق التغطية المعلن عنه فى الخريطة
المفروض انى اسكن جوه محطة اتصالات نفسها

* اضطررت انى اذهب لمنطقة فيها الخدمة جيدة داخل المحافظة و اجلس يوما كاملا
كل اسبوع كاللاجئين عند صديقاتى لأقوم بتحميل الجديد فى العلم و الكتب الطبية الاكترونية

* و فى العيد عيدوا على برسالة بكل ......... و لا كأنهم عاملين حاجة
قلت ماشى و انتوا طيبين
ما هو برده تلاقيهم بيعوضوا لى الفلوس بتوع الرسايل الزايدة
و بيرسلوا لى رسالة فى العيد تضامنا مع المعذبين فى الاتصالات
رسالة مقابل رسائل لم ارسلها ب 36 جنيه

* و بعدين فرع اتصالات فى المحافظة بيعيد علي
قلت ماشى و انتوا طيبين
يمكن بيعوضوا ال 1800 بتوع الخدمة السيئة
التى لا تغطى المنطقة دائما بهذه المعايدة الإلكترونية


* لحد كده و انا عدانى العيب و قزح
لكن كمان قلت اتطفل من نفسى على ال دى اس ال بتاع بيتنا كالعادة
يوم الجمعة و افاجأ بأن الانترنت مش شغال
أجرب عندى اتصالات مش شغال
اكلم اختى عندها فى القاهرة لا الديال اب و لا ال دي اس ال شغال
اتضح انه المشكلة فى الانترنت من مصر كلها

*مش عارفة ليه شعرت ان دى حاجة تحسسنى بالمشاركة
اشمعنى انا يعنى
و قال إيه
رسالة :اتصالات بتعيد عليكى

* علقوا من غير تريقة على لو سمحتم

هناك تعليقان (2):

Aydy يقول...

أشاركك الغيظ في اي خدمة نت في المحروسة 00 يقل العيد بأيام قليلة كنت أبعث تقرير مهم لعملي علي الميل و فجأة أخذت الخدمة تتقطع ثم انقطع نفسها إلي غير رجعة 00 علي مافقت من هول الصدمة ..كانت خدمة العملاء اغلقت هواتفها ذات الرسائل الصوتية السخيفة..وكنا يوم الخميس ..انتظرت بفارغ الصبر ليوم الجمعة..واتاريهم يوم الجمعة مش بيردوا علي حد قبل الساعة الثانية..و عندما بدأت الاجابة أخبرتني الرسالة اللي بتخليني عايزة احدف نفسي من النت..وقالت لي ان الخدمة اتقطعت عندي من قسم المبيعات..وده معناه انني ما سددتش الفاتورة ود اليوم الخامس و قد اعذر من انذر..وانا والله هذه المرة سددت بنفسي و في موعدي بالضبط..طبعا اللي حصل لي اني قعدت أتشال و اتهبد و بخاصة ان كان لازم التقرير يروح في موعده الخميس مساء و اليوم الجمعة...26 رسالة اتصلت بيهم علشان حد يرد علي و اللي يرد عليه مش فاهم حاجة..وانا اصرخ و اقولهم فين الكبير بتاعكم اكلمه..ولا فايدة ويبدو ان بعض صراخي افزعهم و بخحاصه ان واحد فيهم وقع في الكلام و قال ان العيب من عندهم و انهم كانوا يقومون بتحديث النظام ويشوفوا مين اللي دفع و مين اللي ما دفعش..راح النظام كله واقع..واصبح الجميع مدانين وغلطانين و ناس وحشين ومدفعوش وده طبع كومبيوتر مايعرفش خيار ولا فاقوس ولاعندوش حد احسن من حد راح قاطع الخدمة علي الكل..
المهم الخدمة رجعت قرب آخر اليوم
انا اصريت يوم الأحد ان اكلم احد كبرائهم لأن السبت حضراتهم كلهم في اجازة..وقلت له لازم الشركة تعوض الناس اللي كان عندها عمل و اضيرت بهذا الشكل السخيف..الحقيقة اخجلني بتفهمه ورقته وقال لي بمنتهي الفخر..اوكي سنعوضعكم بيوم زيادة مجاني ؟؟؟؟؟؟؟؟؟؟؟؟؟؟؟؟؟؟..قلت له خلي اليوم ده عندكم لوقت زنقة انا بس كنت بااتأكد إنن أنا لسه في البلد دي...شكرا لكم علي تضييعي لوقتكم الثمين..علما بأنني أيضا اسدد كل ثلاثة شهور والحمد لله لم اشترك في البتاع ده اللي بيركبوه في ال يو اس بي زي لكلوك الأطفال...أحمدك يارب و اهو قضي اخف من قضي...كل التحية ..ولا عزاء للمشتركين..

Sonnet يقول...

اهلا دكتورة
يبدو اننى لست وحدى التى اعانى
و معك حق
لا عزاء للمشتركين

Related Posts Plugin for WordPress, Blogger...